Путиндин доору

Владимир Путин орус саясатында аты чыга баштаганына туура 10 жыл болду. Мен бул тууралуу бүгүн “Азаттыкка” макала жаздым. Бирок Путинге, анын “дооруна”, саясатына карата менин жеке пикирим, албетте, анда жазылган жок. Алар жөнүндө кыскача ушул жерде силерге айтайын деп турам...

В.Путиндин аты алгач дүйнөгө жар салынганына азыр 10 жыл болсо, ал мамлекетти де-юре сегиз жылдай бийледи (калган эки жылы премьер-министрлик кызматта өттү). Мына ушул мезгилдин жети жылын мен Орусияда өткөрдүм.

Менин студенттик мезгилим да, журналисттик алгачкы кадамдарым да дал ушул мезгилге туш келди. Путиндин аты менен байланышкан чуулгандуу окуялар: Дубровкадагы “Норд-Ост” окуясы, Бесландагы мектепке чабуул, Чеченстандагы кырдаал, Москвадагы метро станциялардагы жана башка жерлердеги жардыруулар, скинхеддердин баш көтөрүшү, орус олигархтарына чабуул, журналист Анна Политковскаянын өлүмү, кийин Борис Ельциндин дүйнөдөн кайтышы, В.Путиндин экинчи президенттик мөөнөтү, парламенттик шайлоо, Д.Медведев менен тандеми, - ушунун баарын жашап өткөн экем. Алар жөнүндө улам “Азаттыкка” Москвадагы кабарчы катары айтып, жазып турдум.

Учурунда окуя окуя бойдон айтылып, кабар кабар боюнча жазылып кала берет. Бирок азыр артта калган Путиндин мезгилине көз чаптырып, ал жерде менин өзүмдүн “балалык аракетим”, “алгачкы журналисттик кадамдарым” калганын көрдүм. Бул доор мага жакын. Ал мени такшалтты, таптады.

Ал Путиндин саясаттагы жылдызы жанган доор, менин чыгармачылык жолумдун башталышы гана эле.